AREA CENTRAL CELEBRA O NADAL CON PRETO DE 60 ACTIVIDADES EN 30 DÍAS.

Santiago, 1 de decembro de 2009 – A partir deste xoves, 3 de decembro, Area Central dará comezo a súa campaña de Nadal que, nesta ocasión, concentrarase no mes de decembro e nos primeiros catro días de xaneiro nun programa de eventos que contén preto de sesenta actividades en trinta días.

O ambiente de Nadal chegará a Area Central oficialmente o xoves 3 de decembro co acendido das luces interiores que iluminan os corredores do centro comercial e os catro accesos de Area Central, ademais da súa tradicional árbore de Nadal. A partir do 3 de decembro haberá actividades todos os días, a excepción do 25 e 31 de decembro e o 1 de xaneiro, ata o próximo 4 de xaneiro de 2010.

O acendido das luces supón o inicio dun programa amplo de actividades especialmente pensado para os máis pequenos da casa. Os eventos comezarán o mesmo xoves, 3 de decembro, coa visita de Papá Noel todos os días ata o 24 de decembro, día de Noiteboa. O maior número de eventos terá lugar os venres e sábados, ademais dos domingos, xornadas nas cales os establecementos comerciais de Area Central abrirán no seu horario habitual.

Os visitantes de Area Central poderán gozar de case trinta actividades diferentes durante todos os días ata o 4 de xaneiro de 2010. A campaña "Tardes de lecer", monicreques e obras de teatro infantís, contacontos, obradoiros científicos e de temática de Nadal ou concertos didácticos de música clásica son algunhas das actividades dirixidas aos visitantes de menor idade de Area Central. O tradicional sorteo das 101 cestas de Nadal volverá ser o evento estrela de Area Central, que se celebrará o sábado 19 e o domingo 20 de decembro. Ademais, a primeira xornada deste sorteo, o sábado 19, coincidirá coa última edición do ano do rastro de antigüidades que, dende o mes de febreiro, se leva celebrando en Area Central os terceiros sábados de cada mes.

Para ter máis información sobre as actividades de Area Central, visite a programación mensual.