AS RÚAS DE AREA CENTRAL ACOLLEN A EXPOSICION FOTOGRÁFICA “PODEMOS. QUEREMOS. CORRESPONSABILIDADE: RESPONSABILIDADES COMPARTIDAS”

Santiago, 22 de maio de 2006. Dende este mércores día 24 de Maio, e ata o vindeiro luns día 12 de Xuño, as rúas de Area Central acollerán unha exposición fotográfica coa que a Vicepresidencia da Igualdade e do Benestar quere iniciar unha campaña de concienciación sobre a corresponsabilidade, baixo o lema “Podemos. Queremos. Corresponsabilidade: responsabilidades compartidas”.

A exposición, que se inaugurará o día 24 ás 12:30 da mañá, e a que está previsto que asista o Vicepresidente D. Anxo Quintana, está formada por 11 paneis con fotografías de Xurxo Lobato, nas que se observan a diferentes personaxes públicos galegos (varóns), realizando diferentes labores domésticas (lavando, planchando, facendo as camas,...)

Con esta campaña de concienciación inténtase contribuir a que se produza un cambio de mentalidades no senso de que o reparto de responsabilidades no ámbito doméstico e familiar se equilibre, fomentando a conciencia da corresponsabilidade no marco da conciliación da vida profesional e familiar dos traballadores e traballadoras, tendo presente que esta conciliación é unha tarefa de homes e mulleres porque propicia un aumento na calidade de vida de todos e todas.

Os poderes públicos teñen a responsabilidade de promover accións que conduzan á reflexión para que se produza ese cambio de mentalidades na poboación en xeral en canto á necesidade de repartir as responsabilidades, por iso nesta exposición fotográfica recóllese a idea de que xa pasaron os tempos dos prexuízos sexistas en canto á realización das tarefas do fogar, eliminando estereotipos socioculturais respecto do reparto de tarefas no ámbito doméstico familiar.