AREA CENTRAL CUMPRE 14 ANOS CUNHA AMPLA PROGRAMACIÓN

Santiago, 26 de outubro 2007. – O espectáculo visual está garantido hoxe venres 26 e mañá sábado 27 co grupo de performances internacional “Ying&Yang”, que realizará a partir das 19.30 horas no escenario principal unha actuación que fará alusión ao cambio climático. Esta acción enmárcase dentro das actividades conmemorativas do 14º aniversario de Area Central.
Este grupo de artistas abraiará aos visitantes de Area Central cunha prodixiosa posta en escea na que un dos performances tocará un “Didgery-Doo” -instrumento aborixe australiano-, co que despertará á “bola do mundo”, un globo xigante que terá oculto outro performance no seu interior, de onde sairá convertido no Sol. A escea complétase coa actuación dos Trasnos Máxicos, que xurdirán das tebras. Ademais, os “Saltimbanquis da imaxinación” animarán toda a tarde os corredores de Area Central e sorprenderán aos visitantes coas súas arriscadas acrobacias nos seus monociclos, xogos de malabares e espectaculares saltos e piruetas.

Ademais, celebraranse dúas novas sesións da campaña de animación á lectura infantil en galego “Tardes con Uxía e os pillabáns”, acción que se desenvolverá tanto hoxe venres 26 como mañá sábado 27 a partir das 18.00 horas na esquina vermella e que estará baseada no terceiro capítulo da colección de libros de Sotelo Blanco Edicións “Van de merenda”.

Pode obter mais información sobre as actividades de Area Central na programación mensual.