PRAZO ABERTO PARA APUNTARSE NOS CONCURSOS DE ENTROIDO DE AREA CENTRAL

Santiago, 21 xaneiro Xa está aberto o prazo para inscribirse nos dous certames que organiza Area Central para celebrar o Entroido: o IX Concurso da Filloa e Orella, organizado en colaboración con El Correo Gallego e Radio Obradoiro e que terá lugar o venres 1 de febreiro ás 19.00 horas na planta primeira; e o Concurso infantil de disfraces, que se celebrará o sábado 2 de febreiro ás 18.00 horas no escenario principal.

Como nos anteriores anos, o Concurso da Filloa e Orella establece nas súas bases dúas categorías -filloas e orellas- e, dentro destas, premiaranse cun trofeo e cun agasallo a filloa máis orixinal, a filloa máis saborosa e a mellor orella. Ademais, todos os participantes recibirán o seu agasallo. O prazo de inscrición remata ás 22.00 horas do xoves 31 de xaneiro.

Os rapaces tamén disfrutarán do Entroido en Area Central co Concurso infantil de disfraces o sábado 2 a partir das 18.00 horas. Este ano, como novidade, Area Central creou a categoría de parella, polo que as bases quedan deste xeito: individual alevín (ata 8 anos); individual infantil (de 9 a 12 anos), de parella (ata 12 anos) e de grupo (ata 12 anos). Os mellores traxes recibirán grandes agasallos no transcurso dun divertido espectáculo musical. Os interesados poden inscribirse na cabina de información de Area Central ata tres horas antes do inicio do concurso.