AREA CENTRAL ACOLLEU A PRESENTACIÓN DO “CAMPIONATO DE ESPAÑA JUNIOR E SUB 23 DE CICLISMO”

Santiago, 2 de xullo de 2008 Area Central foi hoxe o escenario da presentación do “Campionato de España Junior e sub 23 de ciclismo”, que organiza a Federación Galega de Ciclismo co patrocinio da Fundación Compostela Deporte e os concellos de Santiago, Negreira, Cerceda, Ordes e Oroso. A competición celebrarase os vindeiros días 11, 12, 24, 25 e 26 de xullo nas estradas dos concellos colaboradores.

Ao acto de presentación acudiron, entre outras personalidades, o concelleiro de Deportes de Santiago e Vicepresidente da Fundación Compostela Deporte, Andrés Fariña; o presidente da Federación Española de Ciclismo, Fulgencio Sánchez; o presidente da Federación Galega de Ciclismo, Sabino Cortizo, os alcaldes Juan García, de Negreira; José García, de Cerceda e Manuel Regos, de Ordes; o xefe de servizo de Coordinación Deportiva da Dirección Xeral para o Deporte da Xunta de Galicia, Juan José Rumbao; así como os exciclistas de renome Álvaro Pino e Marcos Serrano.