BONSÁIS, SUISEKIS E PAPIROFLEXIA XAPONESA, ESTA FIN DE SEMANA EN AREA CENTRAL

Santiago, 15 de maio de 2009. - Os días 23 e 24 de maio, Area Central acollerá a quinta edición da "Exposición de Bonsái e Suiseki Cidade de Santiago", cita organizada en colaboración coa Asociación Cultural Bonsái Coruña e que este ano, como novidade, contará cunha pequena mostra de sustratos para bonsáis, ademais dun obradoiro de origami na mañá do sábado 23, no que os máis novos da casa coñecerán este arte xaponés de papiroflexia.

Ademais da ampla selección de bonsáis e suisekis -pedras ornamentais-, o programa desta quinta edición ofrece demostracións de formacións de bonsáis a cargo de especialistas na materia, que se celebrarán na tarde do sábado 23 e o domingo 24.

Durante a celebración deste evento, a esquina vermella de Area Central acollerá unha ampla selección de bonsáis elaborados a partir de diferentes especies de árbores e os visitantes do complexo comercial poderán coñecer máis de preto este mundo a través dun servizo de consultoría permanente no que poderán expoñer as súas dúbidas e curiosidades aos membros integrantes da Asociación Cultural Bonsái Coruña.

Co afán por parte da organización de traer algunha novidade cada ano, na mañá do sábado 23 celebrarase un obradoiro de origami, actividade dirixida especialmente para os máis novos da casa, que aprenderán a realizar figuras a partir de follas de papel. Ademais, os dous días da exposición disposarase unha pequena mostra de sustratos.

O programa da "V Exposición de Bonsái e Suiseki Cidade de Santiago" é o seguinte:

Sábado, 23 de maio

10.00 horas. Apertura da exposición.

10.30 a 11.00 horas. Visita guiada da exposición

11.00 a 14.00 horas. Obradoiro de origami (papiroflexia xaponesa).

17.00 a 20.00 horas. Demostración da formación dun bonsái a cargo de Luis Vila

21.00 horas. Peche da xornada.

Domingo, 24 de maio

10.00 horas. Apertura da feira, exposición e venda de libros.

11.00 a 14.00 horas. Obradoiro consultorio dos aficionados sobre árbores.

17.00 a 20.00 horas. Demostración da formación dun bonsái a cargo de Marcial Campos e Leo Blanco.

21.00 horas. Clausura da "V Exposición de Bonsái e Suiseki Cidade de Santiago".

Todas as actividades de maio de Area Central podes consultalas na programación mensual.